kumarikavacham from Rudrayamala uttaratantra
॥ কুমারীকবচং রুদ্রয়ামলোত্তরতন্ত্রান্তর্গতম্ ॥
আনন্দভৈরব উবাচ --
অথাতঃ সম্প্রবক্ষ্যামি কুমারীকবচং শুভম্ ।
ত্রৈলোক্যং মঙ্গলং নাম মহাপাতকনাশকম্ ॥ ১॥
পঠনাদ্ধারণাল্লোকা মহাসিদ্ধাঃ প্রভাকরাঃ ।
শক্রো দেবাধিপঃ শ্রীমান্ দেবগুরুর্বৃহস্পতিঃ ॥ ২॥
মহাতেজোময়ো বহ্নির্ধর্মরাজো ভয়ানকঃ ।
বরুণো দেবপূজ্যো হি জলানামধিপঃ স্বয়ম্ ॥ ৩॥
সর্বহর্ত্তা মহাবায়ুঃ কুবেরঃ কুঞ্জরেশ্বরঃ ।
ধরাধিপঃ প্রিয়ঃ শম্ভোঃ সর্বে দেবা দিগীশ্বরঃ ॥ ৪॥
ন মেরুঃ প্রভুরেকায়াঃ সর্বেশো নির্মলো দ্বয়োঃ ।
এতত্কবচপাঠেন সর্বে ভূপা ধনাধিপাঃ ॥ ৫॥
ত্রৈলোক্যমঙ্গলকুমারীকবচম্ --
প্রণবো মে শিরঃ পাতু মায়া সন্দায়িকা সতী ।
ললাটোদ্র্ধ্বং মহামায়া পাতু মে শ্রীসরস্বতী ॥ ৬॥
কামাক্ষা বটুকেশানী ত্রিমূত্তির্ভালমেব মে ।
চামুণ্ডা বীজরূপা চ বদনং কালিকা মম ॥ ৭॥
পাতু মাং সূর্যগা নিত্যং তথা নেত্রদ্বয়ং মম ।
কর্ণয়ুগ্মং কামবীজং স্বরূপোমাতপস্বিনী ॥ ৮॥
রসনাগ্রং তথা পাতু বাগ্দেবী মালিনী মম ।
ডামরস্থা কামরূপা দন্তাগ্রং কুঞ্জিকা মম ॥ ৯॥
দেবী প্রণবরূপাঽসৌ পাতু নিত্যং শিবা মম ।
ওষ্ঠাধরং শক্তিবীজাত্মিকা স্বাহাস্বরূপিণী ॥ ১০॥
পায়ান্মে কালসন্দষ্টা পঞ্চবায়ুস্বরূপিণী ।
গলদেশং মহারৌদ্রী পাতু মে চাপরাজিতা ॥ ১১॥
ক্ষৌং বীজং মে তথা কণ্ঠং রুদ্রাণী স্বাহয়ান্বিতা ।
হৃদয়ং ভৈরবী বিদ্যা পাতু ষোডশ সুস্বরা ॥ ১২॥
দ্বৌ বাহূ পাতু সর্বত্র মহালক্ষ্মীঃ প্রধানিকা ।
সর্বমন্ত্রস্বরূপং মে চোদরং পীঠনায়িকা ॥ ১৩॥
পার্শ্বয়ুগ্মং তথা পাতু কুমারী বাগ্ভবাত্মিকা ।
কৈশোরী কটিদেশং মে মায়াবীজস্বরূপিণী ॥ ১৪॥
জঙ্ঘায়ুগ্মং জয়ন্তী মে য়োগিনী কুল্লুকায়ুতা ।
সর্বাঙ্গমম্বিকাদেবী পাতু মন্ত্রার্থগামিনী ॥ ১৫॥
কেশাগ্রং কমলাদেবী নাসাগ্রং বিন্ধ্যবাসিনী ।
চিবুকং চণ্ডিকা দেবী কুমারী পাতু মে সদা ॥ ১৬॥
হৃদয়ং ললিতা দেবী পৃষ্ঠং পর্বতবাসিনী ।
ত্রিশক্তিঃ ষোডশী দেবী লিঙ্গং গুহ্যং সদাবতু ॥ ১৭॥
শ্মশানে চাম্বিকা দেবী গঙ্গাগর্ভে চ বৈষ্ণবী ।
শূন্যাগারে পঞ্চমুদ্রা মন্ত্রয়ন্ত্রপ্রকাশিনী ॥ ১৮॥
চতুষ্পথে তথা পাতু মামেব বজ্রধারিণী ।
শবাসনগতা চণ্ডা মুণ্ডমালাবিভূষিতা ॥ ১৯॥
পাতু মানে কলিঙ্গে চ বৈখরী শক্তিরূপিণী ।
বনে পাতু মহাবালা মহারণ্যে রণপ্রিয়া ॥ ২০॥
মহাজলে তডাগে চ শত্রুমধ্যে সরস্বতী ।
মহাকাশপথে পৃথ্বী পাতু মাং শীতলা সদা ॥ ২১॥
রণমধ্যে রাজলক্ষ্মীঃ কুমারী কুলকামিনী ।
অর্দ্ধনারীশ্বরা পাতু মম পাদতলং মহী ॥ ২২॥
নবলক্ষমহাবিদ্যা কুমারী রূপধারিণী ।
কোটিসূর্যপ্রতীকাশা চন্দ্রকোটিসুশীতলা ॥ ২৩॥
পাতু মাং বরদা বাণী বটুকেশ্বরকামিনী
ইতি তে কথিতং নাথ কবচং পরমাদ্ভুতম্ ॥ ২৪॥
কুমার্যাঃ কুলদায়িন্যাঃ পঞ্চতত্ত্বার্থপারগ
য়ো জপেত্ পঞ্চতত্ত্বেন স্তোত্রেণ কবচেন চ ॥ ২৫॥
আকাশগামিনী সিদ্ধির্ভবেত্তস্য ন সংশয়ঃ ॥ ২৬॥
বজ্রদেহী ভবেত্ ক্ষিপ্রং কবচস্য প্রপাঠতঃ ।
সর্বসিদ্ধীশ্বরো য়োগী জ্ঞানী ভবতি য়ঃ পঠেত্ ॥ ২৭॥
বিবাদে ব্যবহারে চ সঙ্গ্রামে কুলমণ্ডলে ।
মহাপথে শ্মশানে চ য়োগসিদ্ধো ভবেত্ স চ ॥ ২৮॥
পঠিত্বা জয়মাপ্নোতি সত্যং সত্যং কুলেশ্বর
বশীকরণকবচং সর্বত্র জয়দং শুভম্ ॥ ২৯॥
পুণ্যব্রতী পঠেন্নিত্যং য়তিশ্রীমান্ভবেদ্ ধ্রুবম্
সিদ্ধবিদ্যা কুমারী চ দদাতি সিদ্ধিমুত্তমাম্ ॥ ৩০॥
পঠেদ্যঃ শৃণুয়াদ্বাপি স ভবেত্কল্পপাদপঃ ।
ভক্তিং মুক্তিং তুষ্টিং পুষ্টিং রাজলক্ষ্মীং সুসম্পদাম্ ॥ ৩১॥
প্রাপ্নোতি সাধকশ্রেষ্ঠো ধারয়িত্বা জপেদ্যদি ।
অসাধ্যং সাধয়েদ্বিদ্বান্ পঠিত্বা কবচং শুভম্ ॥ ৩২॥
ধনিনাঞ্চ মহাসৌখ্যধর্ম্মার্থকামমোক্ষদম্ ।
য়ো বশী দিবসে নিত্যং কুমারীং পূজয়েন্নিশি ॥ ৩৩॥
উপচারবিশেষেণ ত্রৈলোক্যং বশমানয়েত্ ।
পললেনাসবেনাপি মত্স্যেন মুদ্রয়া সহ ॥ ৩৪॥
নানাভক্ষ্যেণ ভোজ্যেন গন্ধদ্রব্যেণ সাধকঃ ।
মাল্যেন স্বর্ণরজতালঙ্কারেণ সুচৈলকৈঃ ॥ ৩৫॥
পূজয়িত্বা জপিত্বা চ তর্পয়িত্বা বরাননাম্ ।
য়জ্ঞদানতপস্যাভিঃ প্রয়োগেণ মহেশ্বর ॥ ৩৬॥
স্তুত্বা কুমারীকবচং য়ঃ পঠেদেকভাবতঃ ।
তস্য সিদ্ধির্ভবেত্ ক্ষিপ্রং রাজরাজেশ্বরো ভবেত্ ॥ ৩৭॥
বাঞ্ছার্থফলমাপ্নোতি য়দ্যন্মনসি বর্ততে ।
ভূর্জপত্রে লিখিত্বা স কবচং ধারয়েদ্ হৃদি ॥ ৩৮॥
শনিমঙ্গলবারে চ নবম্যামষ্টমীদিনে ।
চতুর্দশ্যাং পৌর্ণমাস্যাং কৃষ্ণপক্ষে বিশেষতঃ ॥ ৩৯॥
লিখিত্বা ধারয়েদ্ বিদ্বান্ উত্তরাভিমুখো ভবন্ ।
মহাপাতকয়ুক্তো হি মুক্তঃ স্যাত্ সর্বপাতকৈঃ ॥ ৪০॥
য়োষিদ্বামভুজে ধৃত্বা সর্বকল্যাণমালভেত্ ।
বহুপুত্রান্বিতা কান্তা সর্বসম্পত্তিসংয়ুতা ॥ ৪১॥
তথাশ্রীপুরুষশ্রেষ্ঠো দক্ষিণে ধারয়েদ্ ভুজে ।
এহিকে দিব্যদেহঃ স্যাত্ পঞ্চাননসমপ্রভঃ ॥ ৪২॥
শিবলোকে পরে য়াতি বায়ুবেগী নিরাময়ঃ ।
সূর্যমণ্ডলমাভেদ্য পরং লোকমবাপ্নুয়াত্ ॥ ৪৩॥
লোকানামতিসৌখ্যদং ভয়হরং শ্রীপাদভক্তিপ্রদ ।
মোক্ষার্থং কবচং শুভং প্রপঠতামানন্দসিন্ধূদ্ভবম্ ।
পার্থানাং কলিকালঘোরকলুষধ্বংসৈকহেতুং জয় ।
য়ে নাম প্রপঠন্তি ধর্মমতুলং মোক্ষং ব্রজন্তি ক্ষণাত্ ॥ ৪৪॥
॥ ইতি শ্রীরুদ্রয়ামলে উত্তরতন্ত্রে মহাতন্ত্রোদ্দীপনে
কুমার্যুপচর্যাবিন্যাসে সিদ্ধমন্ত্রপ্রকরণে
দিব্যভাবনির্ণয়ে নবমপটলে কুমারীকবচম্ সম্পূর্ণম্ ॥
॥ পটলঃ ৯ ॥