chandikavacham
॥ চণ্ডীকবচম্ ॥
শ্রীগণেশায় নমঃ ।
অস্য শ্রীচণ্ডীকবচস্য ব্রহ্মা ঋষিঃ , অনুষ্টুপ্ ছন্দঃ ,
চামুণ্ডা দেবতা , অঙ্গন্যাসোক্তমাতরো বীজম্ ,
দিগ্বন্ধদেবতাস্তত্বম্ , শ্রীজগদম্বাপ্রীত্যর্থে জপে বিনিয়োগঃ ।
ওঁ নমশ্চণ্ডিকায়ৈ ।
ওঁমার্কণ্ডেয় উবাচ ।
ওঁয়দ্গুহ্যং পরমং লোকে সর্বরক্ষাকরং নৃণাম্ ।
য়ন্ন কস্যচিদাখ্যাতং তন্মে ব্রূহি পিতামহ ॥ ১॥
ব্রহ্মোবাচ ।
অস্তি গুহ্যতমং বিপ্র সর্বভূতোপকারকম্ ।
দেব্যাস্তু কবচং পুণ্যং তচ্ছৃণুষ্ব মহামুনে ॥ ২॥
প্রথমং শৈলপুত্রীতি দ্বিতীয়ং ব্রহ্মচারিণী ।
তৃতীয়ং চন্দ্রঘণ্টেতি কূষ্মাণ্ডেতি চতুর্থকম্ ॥ ৩॥
পঞ্চমং স্কন্দমাতেতি ষষ্ঠং কাত্যায়নীতি চ ।
সপ্তমং কালরাত্রিশ্চ মহাগৌরীতি চাষ্টমম্ ॥ ৪॥
নবমং সিদ্ধিদাত্রী চ নবদুর্গাঃ প্রকীর্তিতাঃ ।
উক্তান্যেতানি নামানি ব্রহ্মণৈব মহাত্মনা ॥ ৫॥
অগ্নিনা দহ্যমানস্তু শত্রুমধ্যে গতো রণে ।
বিষমে দুর্গে চৈব ভয়ার্তাঃ শরণং গতাঃ ॥ ৬॥
ন তেষাং জায়তে কিঞ্চিদশুভং রণসঙ্কটে ।
নাপদং তস্য পশ্যামি শোকদুঃখভয়ং নহি ॥ ৭॥
য়ৈস্তু ভক্ত্যা স্মৃতা নূনং তেষাং সিদ্ধিঃ প্রজায়তে ।
প্রেতসংস্থা তু চামুণ্ডা বারাহী মহিষাসনা ॥ ৮॥
ঐন্দ্রী গজসমারুঢা বৈষ্ণবী গরুডাসনা ।
মাহেশ্বরী বৃষারুঢা কৌমারী শিখিবাহনা ॥ ৯॥
ব্রাহ্মী হংসসমারুঢা সর্বাভরণভূষিতা ।
নানাভরণশোভাঢ্যা নানারত্নোপশোভিতা ॥ ১০॥
দৃশ্যন্তে রথমারুঢা দেব্যঃ ক্রোধসমাকুলাঃ ।
শঙ্খং চক্রং গদাং শক্তিং হলং চ মুসলায়ুধম্ ॥ ১১॥
খেটকং তোমরং চৈব পরশুং পাশমেব চ ।
কুন্তায়ুধং ত্রিশূলং চ শার্ঙ্গমায়ুধমুত্তমম্ ॥ ১২॥
দৈত্যানাং দেহনাশায় ভক্তানামভয়ায় চ ।
ধারয়ন্ত্যায়ুধানীত্থং দেবানাং চ হিতায় বৈ ॥ ১৩॥
মহাবলে মহোত্সাহে মহাভয়বিনাশিনী ।
ত্রাহি মাং দেবি দুষ্প্রেক্ষ্যে শত্রূণাং ভয়বর্ধিনি ॥ ১৪॥
প্রাচ্যাং রক্ষতু মামৈন্দ্রী আগ্নেয়ামগ্নিদেবতা ।
দক্ষিণেঽবতু বারাহী নৈঋত্যাং খড্গধারিণী ॥ ১৫॥
প্রতীচ্যাং বারুণী রক্ষেদ্বায়ব্যাং মৃগবাহিনী ।
উদীচ্যাং রক্ষ কৌবেরি ঈশান্যাং শূলধারিণী ॥ ১৬॥
ঊর্ধ্বং ব্রহ্মাণী মে রক্ষেদধস্তাদ্বৈষ্ণবী তথা ।
এবং দশ দিশো রক্ষেচ্চামুণ্ডা শববাহনা ॥ ১৭॥
জয়া মে অগ্রতঃ স্থাতু বিজয়া স্থাতু পৃষ্ঠতঃ ।
অজিতা বামপার্শ্বে তু দক্ষিণে চাপরাজিতা ॥ ১৮॥
শিখাং মে দ্যোতিনী রক্ষেদুমা মূর্ধ্নি ব্যবস্থিতা ।
মালাধরী ললাটে চ ভ্রুবৌ রক্ষেদ্যশস্বিনী ॥ ১৯॥
ত্রিনেত্রা চ ভ্রুবোর্মধ্যে য়মঘণ্টা চ নাসিকে ।
শঙ্খিনী চক্ষুষোর্মধ্যে শ্রোত্রয়োর্দ্বারবাসিনী ॥ ২০॥
কপোলৌ কালিকা রক্ষেত্কর্ণমূলে তু শাঙ্করী ।
নাসিকায়াং সুগন্ধা চ উত্তরোষ্ঠে চ চর্চিকা ॥ ২১॥
অধরে চামৃতকলা জিহ্বায়াং চ সরস্বতী ।
দন্তান্ রক্ষতু কৌমারী কণ্ঠমধ্যে তু চণ্ডিকা ॥ ২২॥
ঘণ্টিকাং চিত্রঘণ্টা চ মহামায়া চ তালুকে ।
কামাক্ষী চিবুকং রক্ষেদ্বাচং মে সর্বমঙ্গলা ॥ ২৩॥
গ্রীবায়াং ভদ্রকালী চ পৃষ্ঠবংশে ধনুর্ধরী ।
নীলগ্রীবা বহিঃকণ্ঠে নলিকাং নলকূবরী ॥ ২৪॥
খড্গধারিণ্যুভৌ স্কন্ধৌ বাহূ মে বজ্রধারিণী ।
হস্তয়োর্দণ্ডিনী রক্ষেদম্বিকা চাঙ্গুলীস্তথা ॥ ২৫॥
নখাঞ্ছূলেশ্বরী রক্ষেত্ কুক্ষৌ রক্ষেন্নলেশ্বরী ।
স্তনৌ রক্ষেন্মহালক্ষ্মীর্মনঃশোকবিনাশিনী ॥ ২৬॥
হৃদয়ে ললিতাদেবী উদরে শূলধারিণী ।
নাভৌ চ কামিনী রক্ষেদ্গুহ্যং গুহ্যেশ্বরী তথা ॥ ২৭॥
কট্যাং ভগবতী রক্ষেজ্জানুনী বিন্ধ্যবাসিনী ।
ভূতনাথা চ মেঢ্রং মে ঊরূ মহিষবাহিনী ॥ ২৮॥
জঙ্ঘে মহাবলা প্রোক্তা সর্বকামপ্রদায়িনী ।
গুল্ফয়োর্নারসিংহী চ পাদৌ চামিততেজসী ॥ ২৯॥
পাদাঙ্গুলীঃ শ্রীর্মে রক্ষেত্পাদাধস্তলবাসিনী ।
নখান্দংষ্ট্রাকরালী চ কেশাংশ্চৈবোর্ধ্বকেশিনী ॥ ৩০॥
রোমকূপেষু কৌবেরী ত্বচং বাগীশ্বরী তথা ।
রক্তমজ্জাবমাংসান্যস্থিমেদাংসী পার্বতী ॥ ৩১॥
অন্ত্রাণি কালরাত্রিশ্চ পিত্তং চ মুকুটেশ্বরী ।
পদ্মাবতী পদ্মকোশে কফে চুডামণিস্তথা ॥ ৩২॥
জ্বালামুখী নখজ্বালা অভেদ্যা সর্বসন্ধিষু ।
শুক্রং ব্রহ্মাণী মে রক্ষেচ্ছায়াং ছত্রেশ্বরী তথা ॥ ৩৩॥
অহঙ্কারং মনো বুদ্ধিং রক্ষ মে ধর্মচারিণি ।
প্রাণাপানৌ তথা ব্যানং সমানোদানমেব চ ॥ ৩৪॥
য়শঃ কীর্তিং চ লক্ষ্মীং চ সদা রক্ষতু বৈষ্ণবী ।
গোত্রমিন্দ্রাণী মে রক্ষেত্পশূন্মে রক্ষ চণ্ডিকে ॥ ৩৫॥
পুত্রান্ রক্ষেন্মহালক্ষ্মীর্ভার্যাং রক্ষতু ভৈরবী ।
মার্গং ক্ষেমকরী রক্ষেদ্বিজয়া সর্বতঃ স্থিতা ॥ ৩৬॥
রক্ষাহীনং তু য়ত্স্থানং বর্জিতং কবচেন তু ।
তত্সর্বং রক্ষ মে দেবি জয়ন্তী পাপনাশিনী ॥ ৩৭॥
পদমেকং ন গচ্ছেত্তু য়দীচ্ছেচ্ছুভমাত্মনঃ ।
কবচেনাবৃতো নিত্যং য়ত্র য়ত্রাধিগচ্ছতি ॥ ৩৮॥
তত্র তত্রার্থ লাভশ্চ বিজয়ঃ সার্বকামিকঃ ।
য়ং য়ং কাময়তে কামং তং তং প্রাপ্নোতি নিশ্চিতম্ ॥ ৩৯॥
পরমৈশ্বর্যমতুলং প্রাপ্স্যতে ভূতলে পুমান্ ।
নির্ভয়ো জায়তে মর্ত্যঃ সঙ্গ্রামেষ্ব পরাজিতঃ ॥ ৪০॥
ত্রৈলোক্যে তু ভবেত্পূজ্যঃ কবচেনাবৃতঃ পুমান্ ।
ইদং তু দেব্যাঃ কবচং দেবানামপি দুর্লভম্ ॥ ৪১॥
য়ঃ পঠেত্প্রয়তো নিত্যং ত্রিসন্ধ্যং শ্রদ্ধয়ান্বিতঃ ।
দৈবী কলা ভবেত্তস্য ত্রৈলোকেষ্ব পরাজিতঃ ॥ ৪২॥
জীবেদ্বর্ষশতং সাগ্রমপমৃত্যু বিবর্জিতঃ ।
নশ্যন্তি ব্যাধয়ঃ সর্বে লূতাবিস্ফোটকাদয়ঃ ॥ ৪৩॥
স্থাবরং জঙ্গমং বাপি কৃত্রিমং চাপি য়দ্বিষম্ ।
অভিচারাণি সর্বাণি মন্ত্রয়ন্ত্রাণি ভূতলে ॥ ৪৪॥
ভূচরাঃ খেচরাশ্চৈব জলজাশ্চোপদেশিকাঃ ।
সহজাঃ কুলজা মালাঃ শাকিনী ডাকিনী তথা ॥ ৪৫॥
অন্তরিক্ষচরা ঘোরা ডাকিন্যশ্চ মহাবলাঃ ।
গ্রহভূতপিশাচাশ্চ য়ক্ষগন্ধর্বরাক্ষসাঃ ॥ ৪৬॥
ব্রহ্মরাক্ষসবেতালাঃ কূষ্মাণ্ডা ভৈরবাদয়ঃ ।
নশ্যন্তি দর্শনাত্তস্য কবচে হৃদি সংস্থিতে ॥ ৪৭॥
মানোন্নতির্ভবেদ্রাজ্ঞস্তেজোবৃদ্ধিকরং পরম্ ।
য়শসা বর্ধতে সোঽপি কীর্তিমণ্ডিতভূতলে ॥ ৪৮॥
জপেত্সপ্তশতীং চণ্ডীং কৃত্বা তু কবচং পুরা ।
য়াবদ্ভূমণ্ডলং ধত্তে সশৈলবনকাননম্ ॥ ৪৯॥
তাবত্তিষ্ঠতি মেদিন্যাং সন্ততিঃ পুত্রপৌত্রকী ।
দেহান্তে পরমং স্থানং য়ত্সুরৈরপি দুর্লভম্ ॥ ৫০॥
প্রাপ্নোতি পুরুষো নিত্যং মহামায়াপ্রসাদতঃ ॥ ৫১॥
॥ ইতি শ্রীবারাহপুরাণে হরিহরব্রহ্মবিরচিতং দেব্যাঃ কবচং সম্পূর্ণম্ ॥